الحلقة الثالثة عشر - سندباد زعلان منكم
سندباد : ياسمينة ....ياسمينة هاتي جاي هالاب طوب وتشوباية شاي بالميرامية
ياسمينة : يا زلمة ذبحتنا بهالاب طوب تبعك ....من يوم ما بعثلك إياه صاحبك من الإماراط ..وانت بتتكشل عليه ثلاث أربع سيعات باليوم
سندباد : ولتش بتعرفي هاظا شو عمل فيي ....هاظا رجعني سندباد من حك وحكيك ....تشل يوم بسافر على متشان وبشوف ناس جداد ....وبتخرف معهم خراريف
ياسمينة : كاعد بتتصرمح وبتسافر وتارتشني بالدار ....والله ظاك خلكي من هالأربع حيطان
سندباد : جيبي هالشاي وتعي افرجيكي
سندباد بفتح على موكع غوشه
ياسمينة : ولك شوهاظ ......له له له .....عزا ولتش هاي صور عرسنا ....ومنو هظول
سندباد : هاظا موكع عيلة صاحبي محيمد .....خرفتك عنه .....بعثلي عشان أعرف أخباره ويعرف أخباري .....شوفي هاظي صورته مع مرته وولاده
ياسمينة : يييي ما زتشاها بنته لصغيره ........وشو هاظ حلكات سندباد ؟؟؟؟؟؟
سندباد : لا ولا إشي خلص هاتي اللاب طوب وحلي عني
ياسمينة : والله ما بتوخذو إلا لما أشوف شو هاي حلكات سندباد ......... شو هاظ ولك هاظا إنتا إلي تشاتبها
حاول سندباد يسحب منها اللاب طوب ....وهو يشد وهي تشد ......وفجأة ترك سندباد اللاب طوب ....ووكعت ياسمينة لورى وطج راسها بالأرظ
سندباد : ولتش أوعي يكون اللاب طوب صارلو إشي
ياسمينة : آآآآآه .......يا راسي .....هاظا إلي هامك ....وأنا إن شاالله أروح دعس
سندباد ...مصخمت وحنون : تعالي ...تعالي ...أنا حخليكي تكريها بس هه ما تزعلي
ياسمينة : لليش بدي أزعل
سندباد ...متردد : بصراححححه .... أنا تشاتب شو بصير عنا هون ....عني وعنك وعن الحارة ....يعني بفش خلكي مش أكثر
ياسمينة بدأت تكرى من الحلكة الأولى للحلكة إطنعش
ياسمينة : ولك أنا هيك ........ييييي هيك بتكول على إمي ..........يا مكلعط عن جد بتحبني ........هسة أنا هيك .....سمالله عليك وعلى أهلك ........يلعن أبو عينك شو حنون ......الله يفظحك معكول تكول هيك كدام العالم ..ألخ
وظلت ياسمينة تكرى ..... وتعلك ....وتضحك ....وتبشي ......تعصب ......وترضى .....ومر الوكت
سندباد : عرفتي هسة شو بعمل على اللاب طوب
ياسمينة : بتعرف عجبني الموضوع ......بس ليش صارلك زمان ما كتبت ولا حلكة ...وليش ما كلتلهم إني حامل بكاسم
سندباد : والله يا ياسمينة ...مكهور ...صارلي فترة بفتح اللاب طوب ....على هالموكع ....وهو هّس ولا في صريخ ابن يومين .....ما بعرفش شو صارلهم .......يمتشن صار في عندهم حصار !!!! ولا شو
ياسمينة : ولا يهمك يا زلمة ... يمتشن مشغولين
سندباد : يا يسمينتي .....يمتشن بالنسبة إلهم هالموكع تسلاية .....بتسلوا فيها شوي وبنسوها شوي ....بس بالنسبة إلي .....هاظا صار سفينتي ....بطلع فيها بره الحارة ...وبره الحصار ..وبرة الكهر والظلم .....وبحس إني عايش وإنه لسه في هوا ممكن نتنفسه .....وإنو لسه في بشر حاسين فينا وبتألموا لوجعنا وبسألوا عن حالنا .......ما بيعرفوا كديش بعاني عشان أشحن اللاب طوب ....وعشان أكدر أصور صورة وأحطها ...وكديش وكديش عشان سندباد يظل حر ....ويظل إنسان ....بحب ....وبكاوم .....ببكي وبفرح ....عشان يظل في دموع يبتيشيها وضحكة يضحكها ......آه لو يعرفوا يا ياسمينة كديش صاروا مهمين بالنسبة إلي
ياسمينة : خلص يا زلمة كطعت كلبي .....شوفلك موكع تاني ......هاي عالتلفزيون بكولوا فص-بوك ومدري شو
سندباد : إلي مكطع كلبي إني حبيت هظول العالم وحاسس إنهم منا وفينا ومش هاين علي أكحطلهم
ياسمينة : ييييي علينا .....هاظا إلي مطمع الناس فينا
سندباد : كومي خلينا نام .....والله بفرجها
محمد غوشه
نوفمبر 28-2011
